५ कात्तिक,कल्याणपुर,सिराहा ।
सिराहाको प्रसिद्ध धार्मिक स्थल कल्याणपुर दुर्गा मन्दिरमा यस वर्षको बडादशैँ मेला भव्यताका साथ सम्पन्न भएको छ। मेला अवधिभर मन्दिरमा भक्तजनहरूबाट संकलन भएको पूजा सामग्री, सुनका गहना र नगदको विवरण मन्दिर समितिले सार्वजनिक गरेको छ।
मन्दिर व्यवस्थापन समितिका अध्यक्ष बासुदेव ठाकुर (टुन टुन) का अनुसार मेला अवधिभर श्रद्धालु भक्तजनहरूबाट कुल १८ क्विन्टल ४२ किलो चामल र १ क्विन्टल २० किलो सुपारी संकलन भएको छ। यसैगरी, मन्दिरको दानपेटीबाट १ लाख १४ हजार २ सय ६० रुपैयाँ नगद रकम संकलन भएको अध्यक्ष ठाकुरले जानकारी दिनुभयो।
मन्दिरमा आफ्नो भाकल पूरा गर्न आएका श्रद्धालुहरूका तर्फबाट यस वर्ष कुल १,६५४ वटा बोकाको बलि प्रदान गरिएको छ। मन्दिरमा एउटा बोका बलि प्रदान गरे बापत २५० रुपैयाँ शुल्क लिने गरिएको थियो, जसअनुसार बलि बापत मात्रै कुल ४ लाख १३ हजार ५ सय रुपैयाँ आम्दानी भएको छ। यसका साथै माता दुर्गालाई चढाएका ८ थान चाँदीका सामर्गी र जिउँदै छाडिएका १८ वटा बोका समेत मन्दिरलाई प्राप्त भएको मन्दिर समितिले जनाएको छ।
श्रद्धालु भक्तजनहरूले माता दुर्गाको चरणमा चढाएको धनमाल अन्तर्गत यस वर्ष ८१ थान सुनको टिकली समेत संकलन भएको अध्यक्ष बासुदेव ठाकुर (टुन टुन) ले बताउनुभयो। परापूर्वकालदेखि नै बडादशैँमा यस मन्दिरमा ठूलो मेला लाग्ने र हजारौँको संख्यामा दर्शनार्थीहरू आउने गर्दछन्।
