८ गते कार्तिक ,मिर्चैया, सिराहा ।
नेपाली कांग्रेसको सांगठनिक तयारीका बीच सिराहाको मिर्चैया नगरपालिकाका वडा नं. १ देखि १२ सम्मका सबै वडाहरूमा वडा अधिवेशन तथा नयाँ कार्यसमिति गठन प्रक्रिया सफलतापूर्वक सम्पन्न भएको छ। नेपाली कांग्रेसका युवा तथा जोसिला नेता अमित कुमार साहको विशेष अगुवाइमा मिर्चैयाका सबै वडाहरूमा सांगठनिक गतिविधिहरू उत्साहजनक रूपमा सम्पन्न भएका हुन्।
पार्टीका नेताहरू शेरबहादुर देउवा तथा डा. शशांक कोइराला पक्षधर स्थानीय नेता एवं कार्यकर्ताहरूको संयुक्त भेला तथा सक्रियतामा मिर्चैयाका सबै वडाहरूमा नेतृत्व चयन प्रक्रियाले पूर्णता पाएको छ। वडा अधिवेशनबाट वडा नं. १ देखि १२ सम्म क्रमशः रामदेव मण्डल (वडा नं. १), मेदनी कुमार श्रेष्ठ (वडा नं. २), रामकृपाल यादव (वडा नं. ३), चन्द्रदिप महतो (वडा नं. ४), पदम साह (वडा नं. ५), धर्मेन्द्र मण्डल (वडा नं. ६), देवराज मसराङ्गी (वडा नं. ७), सुरज राय कुर्मी (वडा नं. ८), पवन कुमार मोची (वडा नं. ९), राजकपुर यादव (वडा नं. १०), रामशंकर यादव (वडा नं. ११) र कपिल साफी (वडा नं. १२) वडा कार्यसमिति सभापति (अध्यक्ष) मा निर्वाचित हुनुभएको छ।
अधिवेशन सम्पन्न भएपश्चात् नेपाली कांग्रेसका युवा नेता अमित कुमार साहले मिर्चैया नगरपालिकाका सबै १२ वटै वडामा उत्साहजनक रूपमा अधिवेशन सम्पन्न भइसकेको र अब चाँडै नै मिर्चैया नगर अधिवेशन समेत सम्पन्न गरिने बताउनुभएको छ। उहाँले नयाँ नेतृत्वले पार्टीलाई थप उचाइमा पु¥याउने विश्वास व्यक्त गर्नुभयो।
युवा तथा जोसिला नेता अमित कुमार साहको ऊर्जावान् नेतृत्व र प्रभावकारी परिचालनका कारण मिर्चैया क्षेत्रका युवाहरू तथा स्थानीय आम कार्यकर्ताहरूमा नयाँ उत्साह थपिएको स्थानीय नेताहरूले बताएका छन्। सबै १२ वटै वडामा नयाँ कार्यसमिति आएसँगै देउवा–कोइराला पक्षले मिर्चैया नगर क्षेत्रमा आफ्नो सांगठनिक पकडलाई थप मजबुत बनाएको छ।
वडा अधिवेशनहरू सफलतापूर्वक सम्पन्न भएसँगै नवगठित समितिहरूले अब स्थानीय स्तरमा संगठन सुदृढीकरण, पार्टीको नीति तथा कार्यक्रमहरूको प्रचारप्रसार र आगामी स्थानीय तहको सांगठनिक अधिवेशनलाई तीब्र रूपमा अगाडि बढाउने रणनीति तय गरेका छन्।
