५ कात्तिक ,काठमाडौँ। नेपालकी पूर्वराष्ट्रपति विद्यादेवी भण्डारी चीनको औपचारिक भ्रमणका क्रममा आज त्यसतर्फ प्रस्थान गरिन्। चीनको हपवे प्रदेशको स्योङआनमा आयोजना हुन लागेको प्रतिष्ठित ‘ग्लोबल गभर्नेन्स् फोरम’मा सहभागी हुनका लागि उनी आज प्रस्थान गरेकी हुन्।
परिवर्तनशील विश्वमा विश्वास र सहकार्यको पुनर्निर्माण’ मुख्य थिम रहेको यो अन्तर्राष्ट्रिय सम्मेलन यही अक्टोबर २३ देखि २५ सम्म भव्य रूपमा आयोजना हुँदैछ। सो सम्मेलनलाई पूर्वराष्ट्रपति भण्डारीले एक विशिष्ट अतिथिका रूपमा सम्बोधन गर्ने कार्यक्रम रहेको उनको निजी सचिवालयले जनाएको छ।
सम्मेलनअन्तर्गत अक्टोबर २४ र २५ मा विभिन्न विषयमा समानान्तर सत्र, उच्चस्तरीय प्यानल छलफल र गोलमेच बैठकहरू पनि सञ्चालन हुनेछन्।
फोरममा संयुक्त राष्ट्रसङ्घ केन्द्रित अन्तर्राष्ट्रिय प्रणालीको संरक्षण, विश्व शान्ति तथा शान्ति स्थापना कार्यमा आवश्यक पर्ने सुधार, बहुपक्षीयताको प्रवद्र्धन, अन्तर्राष्ट्रिय सम्बन्धमा विकासशील मुलुकहरूको बढ्दो भूमिका तथा व्यापारमा ग्लोबल साउथका राष्ट्रहरूको उपस्थितिसम्बन्धी विषयमा गम्भीर बहस हुनेछ।
त्यसैगरी, जलवायु परिवर्तन र यसका असरहरू, हरित तथा न्यून कार्बन विकास, दिगो विकास लक्ष्य, कृत्रिम बौद्धिकता र साइबर स्पेसको सुरक्षालगायत समसामयिक विश्वका महत्त्वपूर्ण मुद्दाहरूमाथि पनि व्यापक छलफल हुने बताइएको छ। पूर्वराष्ट्रपति भण्डारी आगामी सोमबार आफ्नो भ्रमण सम्पन्न गरी स्वदेश फर्किने कार्यक्रम तय भएको छ।
यसैबीच, पूर्वराष्ट्रपतिको यो उच्चस्तरीय चीन भ्रमणलाई नेपालको आन्तरिक राजनीतिक वृत्तमा, विशेष गरी वामपन्थी शक्तिहरूको पुनर्संरचना र सहकार्यको सन्दर्भमा गहिरो चासोका साथ हेरिएको छ।
लामो समयदेखि छिन्नभिन्न अवस्थामा रहेका नेपालका विभिन्न वाम घटकहरू तथा कम्युनिस्ट पार्टीहरूबीच पछिल्लो समय वैचारिक ध्रुवीकरण कम गर्दै वाम एकताको प्रक्रियालाई अगाडि बढाउनुपर्ने आवश्यकता महसुस गरिएको छ।
नेपालको राजनीतिक र कूटनीतिक वृत्तमा लामो अनुभव सङ्गालेकी पूर्वराष्ट्रपति भण्डारीको यो भ्रमणले मित्रराष्ट्र चीनका उच्च पदस्थ अधिकारीहरूसँगको भेटका क्रममा द्विपक्षीय हितका साथै नेपालको राजनीतिक स्थिरता र बाह्य सम्बन्धका विविध आयामहरूमा सकारात्मक संवाद हुने अपेक्षा गरिन्।
यसले देशभित्र छरिएर रहेका वामपन्थी शक्तिहरूलाई एकै सूत्रमा बाँध्न र वैचारिक रूपमा नजिक ल्याउनका लागि आवश्यक नैतिक तथा राजनीतिक आधार तयार पार्न सहयोग पुर्याउने विश्वाससमेत व्यक्त गरिएको छ।
