१४ कात्तिक, सिराहा ।
राष्ट्रिय प्रजातन्त्र पार्टी (राप्रपा) सिराहा जिल्ला कार्यसमितिको आयोजनामा स्थानीय नेता तथा अगुवा कार्यकर्ता भेटघाट एवं अन्तरक्रिया कार्यक्रम सम्पन्न भएको छ। राप्रपा सिराहाका जिल्ला अध्यक्ष शम्भु प्रसाद यादवको अध्यक्षतामा सिराहास्थित पार्टी कार्यालयमा सम्पन्न उक्त विशेष कार्यक्रममा पार्टीका पूर्वअध्यक्ष एवं प्रमुख अतिथि कमल थापा र वरिष्ठ उपाध्यक्ष एवं विशिष्ट अतिथि पूर्वमन्त्री विक्रम पाण्डेको उपस्थिति रहेको थियो। कार्यक्रममा बोल्दै शीर्ष नेताद्वयले पार्टी नेतृत्वको कार्यशैलीप्रति गम्भीर असन्तुष्टि व्यक्त गर्दै तीखो आलोचना गर्नुभएको छ।
अन्तरक्रिया कार्यक्रममा प्रमुख अतिथिको आसनबाट बोल्दै राप्रपाका पूर्वअध्यक्ष कमल थापाले पार्टीको वर्तमान अवस्थाप्रति गम्भीर चिन्ता व्यक्त गर्नुभयो। उहाँले भन्नुभयो, “पार्टी इतिहासमै सबैभन्दा कमजोर अवस्थामा पुगेको छ र कार्यकर्ताहरूमा उत्साह हराउँदै गएको छ। यही स्थिति कायम रहे आगामी निर्वाचनमा उम्मेदवार पाउनसमेत मुस्किल हुनेछ। त्यसैले पार्टीको अस्तित्व जोगाउन र यो संकटबाट बचाउनका लागि नै हामीले देशव्यापी रूपमा ’पार्टी बचाऔं अभियान’ को सुरुवात गरेका हौं।“
पूर्वअध्यक्ष थापाले नेतृत्वको वैचारिक विचलन र सत्ता स्वार्थमाथि गम्भीर प्रश्न उठाउँदै भन्नुभयो, “महाधिवेशनले पारित गरेका सैद्धान्तिक एजेन्डा र रणनीति विपरीत वर्तमान नेतृत्व हिँडिरहेको छ। कोशी प्रदेश लगायतका अन्य प्रदेश सरकारहरूमा सत्ताको सौदाबाजी गर्दै सहभागी हुने, तर बागमती प्रदेशमा चाहिँ किन हुन नपाउने? यस्तो दोहोरो मापदण्ड र विरोधाभासपूर्ण निर्णयको जवाफ वर्तमान नेतृत्वले कार्यकर्तामाझ दिनु पर्छ कि पर्दैन? यो सरासर गलत र अवसरवादी चरित्र हो।
उहाँले देशको समसामयिक राजनीतिक मुद्दामाथि प्रकाश पार्दै दृढताका साथ भन्नुभयो, “यदि आज पनि यो देशमा इमानदारिताका साथ जनमत संग्रह गराउने हो भने मुलुकमा हिन्दूराष्ट्र र राजसंस्थाको पक्षमा स्पष्ट बहुमत आउने निश्चित छ। नेपाली जनता आफ्नो पहिचान र राष्ट्रियताका पक्षमा उभिन तयार छन्, तर नेतृत्वले जनभावनालाई सही दिशा दिन सकेको छैन।
थापाले नेतृत्वको अक्षमता औंल्याउँदै थप्नुभयो, “वर्तमान अध्यक्ष राजेन्द्र लिङ्देनले अहिलेसम्म पार्टी कार्यकर्ताहरूका लागि कुनै पनि वैचारिक वा राजनीतिक प्रशिक्षण कार्यक्रम समेत किन सञ्चालन गर्न सक्नुभएन? यसको मुख्य कारण के होला? वास्तवमा नेतृत्वमा वैचारिक स्पष्टता र संगठन हाँक्ने क्षमताको अभाव देखिएको छ। हामीलाई पार्टीप्रति अगाध माया र चिन्ता लागेर नै विगतमा भएका कमीकमजोरी र गल्तीहरूलाई स्वीकार्दै, कुनै व्यक्तिगत स्वार्थ वा पद नराखी बिनासर्त पार्टीभित्र समाहित भएका हौं। तर वर्तमान नेतृत्वले यस भावनालाई बुझ्न सकेन।
कार्यक्रमलाई विशिष्ट अतिथिको आसनबाट सम्बोधन गर्दै वरिष्ठ उपाध्यक्ष विक्रम पाण्डेले पार्टीभित्र चरम गुटबन्दी, एकलौटी निर्णय र राजाको भावना विपरीत काम भइरहेको भन्दै कडा आपत्ति जनाउनुभयो। उहाँले भन्नुभयो, “चुनावको बेला राजाले जे आग्रह गर्नुभएको थियो, त्यस कुरालाई लत्याएर आफ्नो मनमानी ढंगले मात्र पार्टी चलाउने काम नेतृत्वबाट भयो। पार्टीमा ’वान म्यान आर्मी’ (एकलौटी राज) को सिद्धान्त कदापि ठीक होइन। पार्टी कसैको निजी गुट जस्तो बन्न सक्दैन।
वरिष्ठ उपाध्यक्ष पाण्डेले अध्यक्ष राजेन्द्र लिङ्देनको कार्यशैलीप्रति गम्भीर असन्तुष्टि पोख्दै भन्नुभयो, “चैत १५ गते जनताको स्वतःस्फूर्त सहभागितामा उठेको ऐतिहासिक आन्दोलनलाई वर्तमान अध्यक्ष राजेन्द्र लिङ्देनजीले विदेशीहरूको इसारामा तुहाउने र सम्झौता गर्ने काम गर्नुभयो। हिन्दू राष्ट्र र राजसंस्थाको एजेन्डा बोकेर सरकारमा सहभागी हुनु र आन्दोलनलाई बीचमै विसर्जन गर्नु नेतृत्वको वैचारिक स्खलन हो।“ उहाँले कार्यकर्ताहरूलाई निर्देशनात्मक शैलीमा थप्नुभयो, “हामीले पार्टीलाई ’दास प्रवृत्ति’ भएको संस्था बन्न दिनु हुँदैन। नेतृत्वको गलत कदमको अन्धभक्त बन्ने दास प्रवृत्तिको पार्टी हामीलाई चाहिँदैन। नेताहरूको चाकडीभन्दा विचार, सिद्धान्त र निष्ठाका लागि गरिने संघर्ष प्यारो हुन्छ भन्ने सोचका साथ हामी दृढतापूर्वक अगाडि बढ्नुपर्छ।
आज रवीन्द्र मिश्र जस्ता प्रखर एवं विद्वान व्यक्तित्वहरूलाई आधिकारिक र नेतृत्वदायी भूमिकामा आउन नदिई वा पाखा लगाउने काम भएकोे छ, जुन दुर्भाग्यपूर्ण छ।
शीर्ष नेताद्वयले संगठनभित्र मौलाएका यस्ता गलत प्रवृत्ति, ’वान म्यान आर्मी’ शैली, एकलौटी कार्यशैली, दास प्रवृत्ति, सत्ताको दोहोरो चरित्र र राजाको आग्रह विपरीत गरिएका मनपरी निर्णयहरूलाई सच्याउन नै यो ’पार्टी बचाऔं अभियान’ लिएर देश दौडाहामा निस्कनुपरेको कार्यकर्ताहरूमाझ प्रष्ट पार्नुभयो।
कार्यक्रममा उपस्थित सिराहाका स्थानीय नेता तथा कार्यकर्ताहरूले जिल्लामा संगठन निर्माणका क्रममा भोग्नुपरेका चुनौती, पार्टीको आन्तरिक विवादले तल्लो तहमा पारेको नकारात्मक असर र आगामी चुनावी रणनीतिका विषयमा शीर्ष नेतृत्वलाई जानकारी गराएका थिए।
