वडाध्यक्ष विनोद कुमार यादवको आक्रोशः ’सि
,९ गते भाद्र, सिरहाकल्याणपुर नगरपालिका वडा नं. ९ का निर्वाचित वडाध्यक्ष विनोद कुमार यादवले नगरपालिकाकी कार्यवाहक मेयर रेखा यादवको कार्यशैलीप्रति तीव्र असन्तुष्टि र कडा आक्रोश व्यक्त गर्नुभएको छ। कृषि प्रवद्र्धन र महिला स्वरोजगारका लागि नगरपालिकाको बजेटबाट वितरण गरिने चापा कटर (पशु आहार काट्ने मेसिन), सिलाई मेसिन र सिँचाईका लागि आवश्यक ट्युबवेल (बोरिङ) वितरणमा कार्यवाहक मेयरले चरम एकलौटी, अपारदर्शी र मनपरी निर्णय गरेको उहाँको आरोप छ।
वडाध्यक्ष यादवले आफ्नो आधिकारिक फेसबुक पोष्टमार्फत स्थानीय नेतृत्वलाई कडा चेतावनी दिँदै लेख्नुभएको छ, “नगरपालिका वा स्थानीय तहको बजेट र स्रोत–साधन कसैको बापौती सम्पत्ति होइन। यो सम्पूर्ण जनताको हो, उनीहरूको पसिना र करबाट आएको हो। यसमा सबै नागरिकको उत्तिकै अधिकार छ।
“उहाँले वितरण प्रक्रियाको पारदर्शिता र कानुनी धरातलमाथि गम्भीर प्रश्न उठाउँदै थप्नुभएको छ, “कुनै पनि सरकारी योजना वा सामग्री वितरण गर्दा त्यसको स्पष्ट कार्यविधि र मापदण्ड हुनुपर्छ। यहाँ वितरण गरिएका सिलाई मेसिनहरू वास्तविक गरिब, विपन्न, महिला वा दलित कसका लागि हुन्? कुन मापदण्डका आधारमा वितरण भइरहेको छ? यो कुरा जनताका सामु पारदर्शी हुनुपर्छ। तर कल्याणपुर नगरपालिकामा बिना कार्यविधि नै कार्यवाहक मेयरका आसेपासे र गोजीका मान्छेहरूलाई सरकारी सामग्री वितरण गरिनु सरासर गैरकानुनी र लज्जास्पद कार्य हो। यो मनपरी वितरण अभिलम्ब रोकियोस्।
“आफू निर्वाचित जनप्रतिनिधि भएर पनि आफ्नै वडामा भइरहेको गतिविधिबारे स्थानीय सरकारले बेखबर बनाएकोमा आक्रोश पोख्दै उहाँले कार्यवाहक मेयरलाई सिधै प्रश्न गर्नुभएको छ, “यस वितरणबारे वडाध्यक्षलाई कुनै जानकारी छैन। वडाका जनता आएर मलाई सोधिरहेका छन्, म उनीहरूलाई के जवाफ दिऊँ मेयर साहेब? जनताको सिफारिस लत्याएर आफ्ना मान्छे मात्रै पोस्ने काम तत्काल बन्द हुनुपर्छ।“वडा कार्यालयले स्थलगत आवश्यकता पहिचान गरी सिफारिस गरेका वास्तविक पीडित र विपन्नहरूको सूचीलाई नियतवश लत्याएर कार्यवाहक मेयरले आफ्ना नजिकका कार्यकर्ता फकाउन मात्रै ती सामग्री प्रयोग गरेको वडाध्यक्ष यादवको दाबी छ।
यो पोष्ट सार्वजनिक भएपछि कल्याणपुर नगरपालिकामा कार्यवाहक मेयरको कार्यशैली र वितरण प्रणालीको पारदर्शितामाथि स्थानीय स्तरमा गम्भीर प्रश्न उठेको छ। सामाजिक सञ्जालमा स्थानीय नागरिकहरूले पनि वडाध्यक्ष यादवको भनाइलाई समर्थन गर्दै वास्तविक विपन्नले कहिले न्याय पाउने भन्दै आक्रोश पोखिरहेका छन् र बिना कार्यविधि सामान बाँडेर बजेट दुरुपयोग गरिएको भन्दै छानबिनको माग गरिरहेका छन्। यस विषयमा कार्यवाहक मेयर रेखा यादव वा उहाँको सचिवालयबाट भने अहिलेसम्म कुनै आधिकारिक प्रतिक्रिया आएको छैन।
