सिरहा, २४ असोज । नेपाल कम्युनिष्ट पार्टी (एमाले) को केन्द्रीय कमिटी सदस्यमा सिरहाका वरिष्ठ नेता तथा पूर्व सामान्य प्रशासन मन्त्री धर्मनाथ प्रसाद साह मनोनित हुनुभएको छ।
पार्टी अध्यक्ष केपी शर्मा ओलीको अध्यक्षतामा असोज २२ गतेदेखि तीन दिनसम्म ललितपुरको च्यासलस्थित केन्द्रीय कार्यालयमा चलेको स्थायी कमिटीको प्रथम बैठकले साहलाई केन्द्रीय सदस्यमा मनोनयन गर्ने निर्णय गरेको हो।
पार्टीका महासचिव शंकर पोखरेलद्वारा जारी प्रेस वक्तव्यका अनुसार बैठकले साहलगायत सिरहाका पुराना वामपन्थी नेतासहित अन्य १० जना नेताहरूलाई केन्द्रीय कमिटी सदस्यमा मनोनयन गरेको छ।
यसभन्दा पहिला नेकपा (एकीकृत समाजवादी) मा केन्द्रीय उपाध्यक्षको जिम्मेवारीमा रहनुभएका पूर्व सामान्य प्रशासन मन्त्री साह प्रतिनिधि सभा सदस्य निर्वाचनका बेला नेपाली कम्युनिष्ट पार्टी (नेकपा) बाट उम्मेदवार बन्न आकांक्षा राख्नुभएको थियो। तर, पार्टीले टिकट नदिएपछि उहाँ नेकपा (एमाले) मा प्रवेश गर्नुभएको थियो। एमाले प्रवेश गरेलगत्तै पार्टीले उहाँलाई सिरहाबाट प्रतिनिधि सभा सदस्यको उम्मेदवार बनाएको थियो।
पार्टी विभाजन र विभिन्न राजनीतिक उतारचढावका बीच नेकपा (एकीकृत समाजवादी) हुँदै पुनः नेकपा (एमाले) को मूलधारमा समाहित हुनुभएका वरिष्ठ वामपन्थी नेता एवं पूर्व मन्त्री साहलाई एमालेको यो बैठकले महत्त्वपूर्ण जिम्मेवारीसहित केन्द्रीय कमिटीमा मनोनीत गरेको हो। उहाँ मधेस प्रदेशको वामपन्थी आन्दोलनमा लामो समयदेखि सक्रिय र अनुभवी नेता हुनुहुन्छ।
बैठकले संगठन सुदृढीकरणका लागि आगामी मंसिर २६ गते वडा अधिवेशन र पुस ४ गते पालिका अधिवेशन गर्ने कार्यतालिका तय गर्नुका साथै आगामी मंसिरको पहिलो साता राष्ट्रिय भेला आयोजना गर्ने निर्णय पनि गरेको छ।
