गोलबजार, सिरहा ।
मित्रता नेपाल गोलबजारद्वारा आयोजित शुभकामना आदान–प्रदान कार्यक्रममा संस्थाका अध्यक्ष शिव नन्दन कुमार साहले समाज रूपान्तरणका बहुआयामिक बुँदाहरू समेटिएको वार्षिक कार्ययोजना प्रस्तुत गर्नुभएको छ । नेपालीहरूको महान् चाड बडादसैँ, शुभ दीपावली तथा छठ पर्वको पावन अवसरमा आयोजित सो कार्यक्रममा अध्यक्ष साहले आगामी वर्ष संस्थाले सञ्चालन गर्ने मुख्य रणनीतिहरू सार्वजनिक गर्नुभएको हो ।
अध्यक्ष साहले प्रस्तुत गर्नुभएको कार्ययोजनामा सरसफाइ अभियानदेखि लिएर समाजमा व्याप्त कुरीति र विकृतिहरू हटाउन मित्रता नेपालले नेतृत्वदायी भूमिका खेल्ने कुरालाई प्रमुखताका साथ उठाइएको छ । सामाजिक जागरणका साथै समाजको चौतर्फी विकासका लागि शिक्षा, खेलकुद, र स्वास्थ्य जस्ता महत्त्वपूर्ण विषयहरूलाई समेटेर कार्ययोजना तयार पारिएको उहाँले बताउनुभयो ।
कार्ययोजना प्रस्तुत गर्दै अध्यक्ष साहले भन्नुभयो, “समाजलाई सही दिशा दिन र विसङ्गतिहरू अन्त्य गर्न मित्रता नेपाल सधैं अगाडि आउनु आवश्यक छ, र यसका लागि हामी शिक्षा, स्वास्थ्य र खेलकुदका क्षेत्रमा विशेष कार्यक्रमहरू लिएर गाउँ–गाउँ पुँग्नेछौँ । साथै, उहाँले सम्पूर्ण आम नागरिकमा दसैँ, दीपावली र छठ पर्वको हार्दिक मङ्गलमय शुभकामना समेत व्यक्त गर्नुभयो ।
आपसी भाइचारा र सद्भाव अभिवृद्धि गर्ने उद्देश्यले आयोजित सो कार्यक्रममा संस्थाका पदाधिकारीहरू, को सहभागिता रहेको थियो । सहभागीहरूले अध्यक्ष साहद्वारा प्रस्तुत कार्ययोजनाको स्वागत गर्दै संस्थाको पूर्ण सफलताको कामना गरेका थिए ।
