७ भाद्र सिरहा ।गोलबजार श्रमदान तथा सरसफाइ युवा समूहले गोलबजार नगरपालिकाका प्रमुख (मेयर) श्याम श्रेष्ठको प्रमुख आतिथ्यता तथा श्रमदाता मधु कुमार राईको अध्यक्षतामा आफ्नो दोस्रो वार्षिक उत्सव भव्य रूपमा मनाएको छ। ’सफा, स्वच्छ नगर हाम्रो पहिचानः सरसफाइ र हरियाली हाम्रो अभियान’ भन्ने मूल नाराका साथ आयोजित उक्त कार्यक्रममा सामाजिक, राजनीतिक तथा आध्यात्मिक क्षेत्रका व्यक्तित्वहरूले आ–आफ्नो धारणा राख्नुभएको थियो।
कार्यक्रममा पर्यावरण संरक्षणको सन्देश दिँदै प्रमुख अतिथि र अन्य अतिथिहरूलाई पिपलको पातमा पद उल्लेख गरेर बनाइएको मौलिक ब्याच वितरण गरिएको थियो। यो नौलो प्रयोगलाई उपस्थित सबैले निकै रुचाएका थिए।
कार्यक्रममा मुख्य र उत्कृष्ट मन्तव्य राख्दै मित्रता नेपालका अध्यक्ष एवं अधिवक्ता शिवनन्दन साहले गोलबजार श्रमदान तथा सरसफाइ युवा समूहको अवसरमा भव्य शुभकामना व्यक्त गर्नुभयो। युवाहरूको भूमिकामाथि विशेष जोड दिँदै कानुनी एवं सामाजिक क्षेत्रका बौद्धिक व्यक्तित्व अधिवक्ता साहले भन्नुभयो, “युवा भनेको भविष्यको कर्णधार मात्र नभई वर्तमानको वास्तविक साझेदार पनि हुन्। समाजमा परिवर्तनका लागि युवासँग सहयोग र सहकार्य नगरी कुनै पनि कुरा सम्भव छैन।“ उहाँले जसरी रक्तदान र जीवनदानको अभिभारा युवाहरूको काँधमा छ, त्यसरी नै वर्तमान अवस्थामा समाज निर्माणमा युवाहरूको सहकार्य र सहभागिता हुनु नितान्त जरुरी रहेको औंल्याउनुभयो। समाज रूपान्तरणका लागि सधैं अग्रसर रहने दृढता व्यक्त गर्दै उहाँले थप्नुभयो, “मित्रता नेपाल समाजको हरेक वर्ग र हरेक क्षेत्रमा समाज तथा समग्र देश निर्माणका लागि सधैं सहकार्य गर्न तयार रहेको छ।
“कार्यक्रमको उद्घाटन गर्दै प्रमुख अतिथि मेयर श्याम श्रेष्ठले नगरको सरसफाइ र हरियाली प्रवद्र्धनमा युवा समूहले पुर्याएको योगदानको उच्च प्रशंसा गर्नुभयो। स्थानीय सरकार युवाहरूको यस्ता सकारात्मक र सामाजिक कार्यहरूमा सधैं साथमा रहने प्रतिबद्धता समेत उहाँले व्यक्त गर्नुभयो।
उत्सवको विशेष अवसरमा ’रक्तदान नै जीवन दान हो’ भन्ने पवित्र भावनाका साथ खुल्ला रक्तदान कार्यक्रम समेत आयोजना गरिएको थियो। उक्त रक्तदान कार्यक्रमको सुरुवात कार्यक्रमका अध्यक्ष एवं श्रमदाता मधु कुमार राईले रक्तदान गरेर गर्नुभएको थियो। उहाँको सुरुवातसँगै कार्यक्रममा उपस्थित अन्य थुप्रै युवाहरूले उत्साहजनक रूपमा रक्तदान गरेका थिए।
रक्तदान कार्यक्रमकै अवसरमा बोल्दै ब्रह्माकुमारी ओम् शान्तिका प्रतिनिधिहरूले रक्तदानको महत्वमाथि प्रकाश पार्नुभयो। प्रतिनिधिहरूले ’रक्तदान नै जीवनदान’ भएको कुरामा जोड दिँदै समाजमा शान्ति, एकता र आपसी सद्भाव कायम होस् भनी कामना समेत गर्नुभयो।
कार्यक्रममा बोल्दै नेकपाका नेता उमेश बरालले युवाहरूले चालेको यो कदम र कामको उच्च प्रसंशा गर्दै निकै सराहनीय रहेको बताउनुभयो। उहाँले भन्नुभयो, “म अपाङ्गता भएका कारण शारीरिक रूपले काम गर्न नसके पनि युवाहरूको यस्तो कार्यक्रमको प्रोत्साहनका लागि कुनै कमी हुन दिने छैन।“ सँगसँगै नेता बरालले कार्यक्रमको व्यवस्थापन र समसामयिक घटनामाथि आफ्नो कडा टिप्पणी राख्दै भन्नुभयो, “यो कार्यक्रमको सुरुवातमा न त राष्ट्रिय गान सुनियो, न त सहिदप्रति सम्मान नै व्यक्त गरियो। भर्खरै घटेको घटनामा गरिमा चौधरीमाथि भएको अन्यायविरुद्ध गोलबजार जाग्नुपर्छ र बोल्नुपर्छ।
“यस्तै, कार्यक्रममा आफ्नो धारणा राख्दै अधिवक्ता लक्ष्मण राईले मेयर श्रेष्ठमाथि प्रश्न तेर्स्याउँदै भन्नुभयो, “मेयरले गोलबजार भनेको बजारलाई मात्र बुझ्नुभएको छ, अन्य वडालाई गोलबजार बुझ्नुभएको छैन।“ उहाँले सरसफाइको नाममा बजार क्षेत्रमा मात्र देखाउने काम भइरहेको भन्दै सबै वडामा नगरको समान भूमिका हुनुपर्ने माग गर्नुभयो।कार्यक्रममा स्थानीय युवा, बौद्धिक व्यक्तित्वहरू तथा नागरिक समाजको उल्लेख्य र भव्य सहभागिता रहेको थियो।
