विशेष प्रतिनिधि / सिरहा, २०८३ असोज १८।
मधेस प्रदेशको प्रमुख राजनीतिक शक्ति जनमत पार्टीको वीरगन्जमा सम्पन्न दोस्रो महाधिवेशन (२०८३) बाट सिरहा जिल्लाले केन्द्रीय नेतृत्वमा बलियो उपस्थिति जनाएको छ। निर्वाचन समितले सार्वजनिक गरेको अन्तिम मतपरिणाम अनुसार सिरहाका उम्मेदवारहरू केन्द्रीय उपाध्यक्ष, राष्ट्रिय महासचिव र राष्ट्रिय उपमहासचिव जस्ता महत्त्वपूर्ण र शक्तिशाली पदहरूमा निर्वाचित हुन सफल भएका छन्।
निर्वाचन समितिका अनुसार ७ पद रहेको केन्द्रीय उपाध्यक्षमा सिरहाकी अनिता कुमारी मण्डल र राजकुमार यादव (त्यागी) विजयी हुनुभएको हो।
त्यसैगरी, अत्यन्तै प्रतिष्ठाको विषय बनेको १ पद मात्र रहेको राष्ट्रिय महासचिव पदमा सिरहाकै संजय कुमार यादव भारी मतका साथ निर्वाचित हुनुभएको छ। उहाँले ६१८ मत प्राप्त गर्दै महासचिव पदमा सानदार जित दर्ता गर्नुभयो। सोही पदका अन्य प्रतिस्पर्धीहरू ममता झा (सप्तरी) ले २२० मत र चन्दन कुमार सिंह (महोत्तरी) ले १६५ मत प्राप्त गरे पनि उनीहरूले २० प्रतिशतको थ्रेसहोल्ड समेत कटाउन सकेनन्।
यस्तै, १ पद नै रहेको राष्ट्रिय उपमहासचिव पदमा पनि सिरहाकै निर्मल कुमार मण्डल निर्वाचित हुन सफल हुनुभएको छ। मण्डलले ५०१ मत प्राप्त गरी आफ्ना निकटतम प्रतिद्वन्द्वी रौतहटका ललितचन्द्र मल्लिक (४१४ मत) लाई पराजित गर्नुभएको हो।
महाधिवेशनमा कुल ११२६ मत खसेको र सबै मत सदर भएको निर्वाचन समितिले जनाएको छ। पार्टीका केन्द्रीय अध्यक्षमा डा. सी.के. राउत ९५८ मतका साथ निर्विरोध जस्तै निर्वाचित भइसकेका छन्। केन्द्रीय कार्यसमितिमा सिरहा जिल्लाबाट मुख्य पदहरूमा ठुलो जित हासिल भएपछि जिल्लाका स्थानीय नेता तथा कार्यकर्ताहरूले खुसीयाली मनाउन सुरु गरेका छन्।
