२३ असोज, सिराहा।
गत २०८२ साल साउन १४ गते सुनसरीको देवानगंज तथा कप्तानगंजमा भएको हिन्दू–मुस्लिम विवादको तरंग सिराहा आइपुग्दा गोलबजारमा भएको हिंस्रक प्रदर्शन, अर्बौँको क्षति र करोडौँको डाँका मुद्दामा सिराहा जिल्ला अदालतले अगुवा हिन्दू आन्दोलनकारीहरूलाई पुर्पक्षका लागि जेल चलान गर्ने आदेश दिएको छ ।
सुनसरीको घटनालाई लिएर साउन १४ गते सिराहाको गोलबजारमा भएको प्रदर्शनका क्रममा औरही गाउँपालिका–२, तुलसियाहीका किशोर गणेश यादवको मृत्यु भएपछि आन्दोलन झन् हिंस्रक बनेको थियो। आन्दोलनलाई नियन्त्रण बाहिर पुर्याई जाहेरवालाहरूको सम्पत्ति लुटपाट र आगजनी गराउन भूमिका खेलेको अभियोगमा माननीय न्यायाधीश श्री भीमबहादुर निरौलाको इजलासले असोज २३ गते थुनछेक आदेश जारी गर्दै आन्दोलनका अगुवा प्रतिवादीहरू काशिन्द्र यादव र संजय साह दुवैलाई पुर्पक्षका लागि कारागार चलान गर्न आदेश दिएको हो ।
प्रतिवादी संजय साहको हकमा एक मुद्दामा ५० हजार धरौटी तोकिए तापनि अर्को मुख्य डाँका मुद्दामा थुनामै राख्ने आदेश भएकाले उनी रिहा हुन पाएका छैनन् र दुवै जना कारागारमै रहनेछन् ।
अनुसन्धानका क्रममा प्रतिवादी काशिन्द्र यादवले अधिकारप्राप्त अधिकारी (प्रहरी) समक्ष दिएको बयान निकै महत्त्वपूर्ण देखिएको छ। उनले आन्दोलनमा आफूले हिन्दू धर्मको प्रचार–प्रसार गर्दै हिन्दू–मुस्लिम बीच वैमनस्यता फैलाउने खालको भाषण गरिरहेको कुरा स्वीकारेका थिए। प्रहरीले देखाएको भिडियो फुटेज हेरेर काशिन्द्रले आफूलाई चिन्नुका साथै आन्दोलनको नेतृत्व गर्ने र भिडलाई उचाल्ने अन्य दुई जना अगुवाहरू बिनोद यादव र किसोरी यादव भएको भनी नाम समेत खोलेका छन्।
काशिन्द्रले बयानमा भनेका छन्, “मैले भाषण गर्दा हिन्दूवादी पक्षका आक्रोशित भिड उत्तेजित भई एबी मल, फेसन प्लाजा र न्यू असलम बस्त्रालयमा समेत तोडफोड, लुटपाट र आगजनी गर्न पुगेको थियो ।“ अर्कोतर्फ प्रतिवादी संजय साहले पनि सुनसरीमा हिन्दू समाजका मानिस मारिएको हल्ला चलेपछि आक्रोशित भिडले मुस्लिमहरूको घर–पसल तोडफोड तथा आगजनी गर्नुपर्छ भनेकाले आफू आन्दोलनमा लागेको स्वीकारेका थिए। यद्यपि, अदालतमा बयान दिँदा भने दुवै प्रतिवादीहरूले आफूहरू आ–आफ्नो पसल र घरमा रहेको दाबी गर्दै कसूर अस्वीकार गरेका थिए ।
नेपाल सरकारले पक्राउ परेका अगुवाहरू विरुद्ध दुईवटा छुट्टाछुट्टै अभियोग दर्ता गरेको थियोः
१. न्यू असलम बस्त्रालय र आलिया इन्टरप्राइजेज (मुद्दा नं. ०८३–८१–०२३४)ः यस पसलबाट रू. २ लाख नगद र रू. ५ करोड २ लाख बराबरको सुनका गहना लुटपाट गरेको अभियोगमा दुवै प्रतिवादीलाई थुनामा राख्न आदेश भएको छ।
२. एबी मल / सिराहा सुपर मार्केट (मुद्दा नं. ०८३–८१–०२३५)ः यस मलमा रू. ३ लाख ५० हजार नगद लुटिएको र आगजनीबाट रू. २९ करोड ६५ लाख ५० हजार बराबरको अकल्पनीय भौतिक क्षति पुर्याएको अभियोग सरकारको छ ।
यस गम्भीर मुद्दामा वादी नेपाल सरकारका तर्फबाट जिल्ला न्यायाधिवक्ता श्री सिताराम राउत र सहायक जिल्ला न्यायाधिवक्ता श्री विद्यानन्द साहले बहस गर्नुभएको थियो ।
जाहेरवालाको तर्फबाट अधिवक्ता द्वय श्री आनन्दराज पोखरेल र श्री लक्ष्मणप्रसाद राईले पक्षपोषण गर्नुभयो ।
प्रतिवादीहरूको प्रतिरक्षामा अधिवक्ताहरू श्री शिवनन्दनकुमार साह, श्री पशुपति कार्की, श्री प्रशान्तकुमार साह, श्री श्यामकुमार यादव र प्रतिवादी संजय साहको तर्फबाट श्री सन्तोषकुमार शर्माले बहस गर्नुभएको थियो।
अदालतले तत्काल प्राप्त प्रमाण र भिडियो फुटेजका आधारमा उनीहरूलाई हालै निर्दोष मान्न नसकिने भन्दै जेल चलानको आदेश दिएको हो ।
