तमिलनाडुका मुख्यमन्त्री तथा अभिनेता सी. जोसेफ विजयकी श्रीमती संगीताले शुक्रबार सम्बन्ध विच्छेदको निवेदन फिर्ता लिएकी छन्।
यससँगै चेङ्गलपट्टु पारिवारिक अदालतले जारी सम्बन्ध विच्छेदको मुद्दा बन्द गरेको छ।
समाचार एजेन्सी एएनआईका अनुसार शुक्रबार भएको मुद्दा सुनुवाइमा संगीता भिडिओ कन्फरेन्सिङमार्फत अदालतमा उपस्थित भइन् र न्यायाधीश सुजातालाई सम्बन्ध विच्छेदको निवेदन फिर्ता लिन चाहेको जानकारी गराइन्।
यसपछि न्यायाधीशले उनलाई लगभग १५ मिनेट सोधपुछ गरिन् र सम्बन्ध विच्छेदको मुद्दा खारेज गरिन्।
संगीताले यही वर्ष फेब्रुअरीमा सम्बन्ध विच्छेदका लागि निवेदन दिएकी थिइन्।
उनले पति विजयविरुद्ध विवाहेतर सम्बन्ध रहेको आरोप लगाएकी थिइन्।
विजय यसै वर्ष मे १० मा तमिलनाडुको मुख्यमन्त्रीका रूपमा शपथ खाएका थिए।
निवेदनमा भनिएको थियोः विजय अप्रिल २०२१ देखि एक अभिनेत्रीसँग सम्बन्धमा छन्
समाचार एजेन्सी पीटीआईका अनुसार संगीताले निवेदनमा पति एक अभिनेत्रीसँग विवाहेतर सम्बन्ध रहेको दाबी गरेकी थिइन्।यस विषयमा आफूले अप्रिल २०२१ मा थाहा पाएको उनले उल्लेख गरेकी थिइन्। यद्यपि उनले अभिनेत्रीको नाम लिएकी थिइनन्।
उनले यो पनि आरोप लगाएकी थिइन्, ‘विजयले मलाई बारम्बार मानसिक यातना दिए। बेवास्ता गरे र मलाई त्यागे। आवश्यक परेमा म अभिनेत्रीलाई पनि मुद्दामा दोस्रो पक्ष बनाउनेछु।’
संगीताले निवेदनमा पतिले यस्तो परिस्थिति सिर्जना गरेका थिए कि जसका कारण आफूहरू एउटै घरमा पनि छुट्टै बस्न बाध्य भएको दाबी गरेकी थिइन्। यसैले विशेष विवाह ऐन, १९५४ अन्तर्गत सम्बन्ध विच्छेदको मुद्दा दिएको उल्लेख गरेकी थिइन्।
