४ भाद्र सिरहा । सिरहाको कल्याणपुर नगरपालिका वडा नम्बर १० मा आफ्नै निजी जग्गामा बनाइएको घर श्रीचन्द्री देवी आधारभूत विद्यालय डोकहा बंगठियाको पोखरीमा भासिएपछि पाचँ सन्तानसहित बिचल्लीमा परेकी एकल महिला पुष्‍पा देवीको घटनामा एउटा स्तब्ध पार्ने तथ्य बाहिर आएको छ। विद्यालयको उक्त पोखरीको अन्य सबै स्थानमा सुरक्षित ’डिल’ (बाँध) बनाइएको भए पनि पीडित पुष्‍पा देवीको निजी जग्गा र घर जोडिएको ठाउँमा मात्र डिल नबनाइएको पाइएको छ। यही विभेदपूर्ण र गम्भीर लापरबाहीका कारण पानीको कारणले गर्दा एकल महिला पुष्‍पा देवीको घर अचानक पोखरीमा धसिएको हो।यस घटनाका सम्बन्धमा श्रीचन्द्री देवी आधारभूत विद्यालय व्यवस्थापन समितिका अध्यक्ष श्रीदेव मण्डलले पुष्‍पा देवी पीडित भएको र उनको घरमा क्षति पुगेको कुरा स्वीकार गरे पनि पीडित परिवारलाई दिइने उचित क्षतिपूर्तिको विषयमा भने केही बोल्न चाहेका छैनन्। जिम्मेवार ओहोदामा रहेका व्यक्ति नै क्षतिपूर्तिको सवालमा पन्छिन खोजेपछि पीडितको न्याय पाउने आशमा ठेस लागेको छ।पति गुमाएर एक्लै संघर्ष गर्दै ५ साना सन्तान हुर्काइरहेकी पुष्‍पा देवीका लागि यो घटना ठूलो बज्रपात बनेको छ। खुला आकाशमुनि बस्नुपर्ने बाध्यताका कारण बालबालिकाहरूको सुरक्षालाई लिएर पुष्‍पा देवी निकै भावविह्वल बनेकी छिन्। यो मानवीय संकट हुँदा समेत कल्याणपुर नगरपालिका र वडा कार्यालयले कुनै चासो नदेखाएपछि पीडित एकल महिला सदरमुकामस्थित जिल्ला प्रशासन कार्यालय सिरहा पुगेकी थिइन्।एकल महिलाको यो गम्भीर अवस्था र विद्यालयको लापरबाहीलाई ध्यानमा राख्दै जिल्ला प्रशासन कार्यालय सिरहाले तत्काल कडा कदम चालेको छ। जिल्ला प्रशासनकार्यलयले श्रीचन्द्री देवी आधारभूत विद्यालयका प्रधानाध्यापक (प्रअ) जागेश्वर कामती र विद्यालय व्यवस्थापन समितिका अध्यक्ष श्रीदेव मण्डल दुवैलाई यही सोमबार जिल्ला प्रशासन कार्यलय सिराहामा अनिवार्य उपस्थित हुन जानकारी दिएको छ। स्थानीय सरकार र विद्यालयले चासो नदिएपछि निराश बनेकी पुष्‍पा देवीमा जिल्ला प्रशासनको यो एक्सनपछि सोमबार आफूले न्याय र उचित क्षतिपूर्ति पाउने भने आशामा वसेकी छिन।